الامين
27-05-2000, 12:16 PM
المعلّم أو بعض القرى يطلقون عليه الكتاتيب .... وفيه يكون الاستاذ هو المعلّم أو المعلّمه ... وتّلقى معظم الخطباء الكرام تعليمهم عند المعلم .... ويكون فيه التعليم مختلط يعني صبيان وبنيات ....
وقته : فترتين صباحية من الصبح الى وقت الظهر , وعصريه وتبدأ من بعد الغذاء الى قريب السلوم (الغروب) .
والأيام من السبت الى الخميس...
يجيبك الوالد ويقطك على المعلم بعد ما يتفق معاه ... ويقوله جبت لك اياه لحم رجع لي اياه عظم (يعني طقه) ...
ويجيب معه الولد أول ما يجي بيضه أو بخورة على حسب الاستطاعة .... ومعدّل ونظيف , وراسه حالقين له إما دروه (وهي يحلقون كل الراس وتبقى دائره في الوسطه ) أو قصّه (وهي يحلقون الراس كله بس يبقون قصّه )
وأول ما تدخل تشوف غوله يعني ناس وايد ... والمعلم جالس على تكيه (شيء مرتفع ) وفي يده الخيزرانه ... والخيزرانه شيء معتبر طويلة مدلقمة من طرف وضعيفة من طرف اخر ...
المعلم يدرس الكبار ودروس متقدمه , أما الصغار فيدرسهم الناس اللي أكبر منهم , يعني اذا انت خاتم جزء تبارك وشاطر تقدر تدرس الصغار اللي توهم جايين .....
المعلم فوق لكن يسمع كل شيء والخيزرانه في يده من يسمع شيء غلط جاتك الخيزرانه من حيث لا تدري ...فتجيك على الراس على الظهر على الخشم , أنت وحظك ... واذا الغلطة شايده طقك بطرف المدلقم .... ويقوم الصياح بعض الأوقات .....
أول ما يجي الياهل يعلمونه بسم : يعني بسم الله الرحمن الرحيم .... وطريقة تعليمها : بِ كسرة بِ , سين سكته سين , ميم كسرة ميم ..... الى أن توصل الى الرحيم ...
اذا ختمتها : تروح الى المرحلة الثاني , وهي الهّياء (الهجاء) , والهياء تنقسم الى قسمين :
القسم الأول : أبجد وهي معرفة الحروف بطريقة أبجد هوز حطي كلمن صعفت قرشت ... وباقيها ما حد يقدر يحفظها لأنه غلج , صعب , وهي ثخذ , ضظغ ....
والقسم الثاني : ألف لا شيله ... وهي تهجئة أ ب ت ث ج ..... وتكون قراءتها ألف لا شيله والباء نقطة من تحت والتاء نقطتين من فوق والثاء ثلاث أنقاط من فوق والجيم نقطة من تحت والحاء لا شيله والخاء نقطة من فوق والدال لا شيله .... وهكذا الى أن تصل الى الياء وتقول الياء نقطتين من تحت , ثم تختمها بالسلام ..... أي والسلام .....
فاذا ختمت الهياء تتخرج وتروح الى المرحلة اللي بعدها وهي القرآن وتبدأ من جزء عم وبالتحديد أول شيء الحمد , ويعلمك اياها زي ما قلنا واحد من الشاطرين أو وحده من الشاطرات , يجلس اللي يعلمك بالتربيعة وأنت تقابله بالتربيعه أيضا وركبتك فوق ركبته وتقعدون تنزون وراء وقدام بسم الله الرحمن الرحيم ... وأنت ترد بقوة بسم الله الرحمن الرحيم .. الحمد لله رب العالمين ... وأنت ترد الحمد لله رب العالمين الين تنتهي ....
لما ينتهي يروحون اثنينهم الى المعلم ويراجع وياهم اللي ختمه اذا صح قال روح للسورة اللي بعدها , واذا غلط في شيء حصل له طراق واللي علمه حصل طراقين ..... لين يختم
اذا ختم سورة ايلاف قريش : لازم يجيب المايده , والمايده وصلت الى عشرة ريالات وبعض الأحيان يجيبون بعد بلاليط (سيويا) .... ولما يختم بعض السور مثل سورة الرحمن ..... أيضا يأتي بمائدة ...
زين لما يختم القران يلبسونه ثياب نظيفة وقحفية مطرزة , ويدورون به الفريج (الحارة) زفه ما بعدها زفه , وأمه تطلع تشوفه وتيبب كنّه معرس ..... ويجيبون بعد مايدة كبيرة ....
عاد بعدين اللي يبغي يواصل الدراسات العليا يواصل :
زين ويش هي الدراسات العليا : هي الفخري والمقتل وهذا اللي يبغي يواصل على شان يصير ملاّ أو ملاّية ....
فيه عندنا شيء اسمه اربعانية : وهي يوم اللي تعطي فيه المعلم فلوسه : كل أربعاء الولد يجيب الأربعانية ويعطيها المعلم , واذا نسى الواحد ترى بعضهم يفشلونه .... قديما جدا كانوا يعطونه 4 بيزات وبعدها بشوي صاروا يعطونه 4 قروش ويسمونها 4 كبار , لأنه اهي أكبر عمله ....
زين : اذكر بعض الشيلات , وهي :
السبت ياسبمبوت .. والاحد يابو تابوت ... والاثنين بان بان ... والثلاثاء علش (علك) لبان ... والأربعاء فرحتكم ياصبيان ... والخميس هدّه هدّه ... والجمعه سكته سكته ....
هذي كنا نشيله أكثر شيء يوم الخميس وهي يوم الفرحه عندنا .......
يوم الأربعاء العصرية ساعات : يشيلون شيله :
تمس يامعلم بالسعادة .......... وأمرنا بأمرك في الرواح
فأما الضرب يوجعنا ويبرى .... وأما العلم فلنا فيه صلاح
بدأنا بالنبي أحمد محمد ..... رسول الله حي على الفلاح
وحيدرة أبي حسن علي .... مبيد الشرك في يوم الكفاح
.......
زين الحين خلونا نتذكر بعض المعلمين :
1-علي جاسم الكبيش
2-عبدالنبي الحلال
3-علي السعيد
4-ابراهيم الحواج
5-ملا كاظم الزواد
6-عبدالنبي مدن
وغيرهم الكثير لكن هذا اللي قدرت أحصل عليه .....
بعد خلونا نذكر الملالي (الخطباء) اللي تعلموا عند معلمين :
الاستاذ : ملا علي بن سالم ( وهو شاعر كبير وعظيم ويقال أنه شبه ملا عطيه ) وتتلمذ على يديه :
1-عبدالمحسن النصر
2-عبدالكريم الحمود
3-أحمد خميس
4- الشيخ عبدالمجيد أبوالمكارم
وغيرهم الكثير أيضا .....
حفظ الله الباقين ورحم الله المتوفين .....
------------------------------------------------
المراجع :
1-من الذاكرة
2-أحد المؤمنين نقلا عن إحدى قريباته
[ALIGN=LEFT][SIZE=1][هذا الموضوع تم تحريره بواسطة الامين (في 29-05-2000).]
وقته : فترتين صباحية من الصبح الى وقت الظهر , وعصريه وتبدأ من بعد الغذاء الى قريب السلوم (الغروب) .
والأيام من السبت الى الخميس...
يجيبك الوالد ويقطك على المعلم بعد ما يتفق معاه ... ويقوله جبت لك اياه لحم رجع لي اياه عظم (يعني طقه) ...
ويجيب معه الولد أول ما يجي بيضه أو بخورة على حسب الاستطاعة .... ومعدّل ونظيف , وراسه حالقين له إما دروه (وهي يحلقون كل الراس وتبقى دائره في الوسطه ) أو قصّه (وهي يحلقون الراس كله بس يبقون قصّه )
وأول ما تدخل تشوف غوله يعني ناس وايد ... والمعلم جالس على تكيه (شيء مرتفع ) وفي يده الخيزرانه ... والخيزرانه شيء معتبر طويلة مدلقمة من طرف وضعيفة من طرف اخر ...
المعلم يدرس الكبار ودروس متقدمه , أما الصغار فيدرسهم الناس اللي أكبر منهم , يعني اذا انت خاتم جزء تبارك وشاطر تقدر تدرس الصغار اللي توهم جايين .....
المعلم فوق لكن يسمع كل شيء والخيزرانه في يده من يسمع شيء غلط جاتك الخيزرانه من حيث لا تدري ...فتجيك على الراس على الظهر على الخشم , أنت وحظك ... واذا الغلطة شايده طقك بطرف المدلقم .... ويقوم الصياح بعض الأوقات .....
أول ما يجي الياهل يعلمونه بسم : يعني بسم الله الرحمن الرحيم .... وطريقة تعليمها : بِ كسرة بِ , سين سكته سين , ميم كسرة ميم ..... الى أن توصل الى الرحيم ...
اذا ختمتها : تروح الى المرحلة الثاني , وهي الهّياء (الهجاء) , والهياء تنقسم الى قسمين :
القسم الأول : أبجد وهي معرفة الحروف بطريقة أبجد هوز حطي كلمن صعفت قرشت ... وباقيها ما حد يقدر يحفظها لأنه غلج , صعب , وهي ثخذ , ضظغ ....
والقسم الثاني : ألف لا شيله ... وهي تهجئة أ ب ت ث ج ..... وتكون قراءتها ألف لا شيله والباء نقطة من تحت والتاء نقطتين من فوق والثاء ثلاث أنقاط من فوق والجيم نقطة من تحت والحاء لا شيله والخاء نقطة من فوق والدال لا شيله .... وهكذا الى أن تصل الى الياء وتقول الياء نقطتين من تحت , ثم تختمها بالسلام ..... أي والسلام .....
فاذا ختمت الهياء تتخرج وتروح الى المرحلة اللي بعدها وهي القرآن وتبدأ من جزء عم وبالتحديد أول شيء الحمد , ويعلمك اياها زي ما قلنا واحد من الشاطرين أو وحده من الشاطرات , يجلس اللي يعلمك بالتربيعة وأنت تقابله بالتربيعه أيضا وركبتك فوق ركبته وتقعدون تنزون وراء وقدام بسم الله الرحمن الرحيم ... وأنت ترد بقوة بسم الله الرحمن الرحيم .. الحمد لله رب العالمين ... وأنت ترد الحمد لله رب العالمين الين تنتهي ....
لما ينتهي يروحون اثنينهم الى المعلم ويراجع وياهم اللي ختمه اذا صح قال روح للسورة اللي بعدها , واذا غلط في شيء حصل له طراق واللي علمه حصل طراقين ..... لين يختم
اذا ختم سورة ايلاف قريش : لازم يجيب المايده , والمايده وصلت الى عشرة ريالات وبعض الأحيان يجيبون بعد بلاليط (سيويا) .... ولما يختم بعض السور مثل سورة الرحمن ..... أيضا يأتي بمائدة ...
زين لما يختم القران يلبسونه ثياب نظيفة وقحفية مطرزة , ويدورون به الفريج (الحارة) زفه ما بعدها زفه , وأمه تطلع تشوفه وتيبب كنّه معرس ..... ويجيبون بعد مايدة كبيرة ....
عاد بعدين اللي يبغي يواصل الدراسات العليا يواصل :
زين ويش هي الدراسات العليا : هي الفخري والمقتل وهذا اللي يبغي يواصل على شان يصير ملاّ أو ملاّية ....
فيه عندنا شيء اسمه اربعانية : وهي يوم اللي تعطي فيه المعلم فلوسه : كل أربعاء الولد يجيب الأربعانية ويعطيها المعلم , واذا نسى الواحد ترى بعضهم يفشلونه .... قديما جدا كانوا يعطونه 4 بيزات وبعدها بشوي صاروا يعطونه 4 قروش ويسمونها 4 كبار , لأنه اهي أكبر عمله ....
زين : اذكر بعض الشيلات , وهي :
السبت ياسبمبوت .. والاحد يابو تابوت ... والاثنين بان بان ... والثلاثاء علش (علك) لبان ... والأربعاء فرحتكم ياصبيان ... والخميس هدّه هدّه ... والجمعه سكته سكته ....
هذي كنا نشيله أكثر شيء يوم الخميس وهي يوم الفرحه عندنا .......
يوم الأربعاء العصرية ساعات : يشيلون شيله :
تمس يامعلم بالسعادة .......... وأمرنا بأمرك في الرواح
فأما الضرب يوجعنا ويبرى .... وأما العلم فلنا فيه صلاح
بدأنا بالنبي أحمد محمد ..... رسول الله حي على الفلاح
وحيدرة أبي حسن علي .... مبيد الشرك في يوم الكفاح
.......
زين الحين خلونا نتذكر بعض المعلمين :
1-علي جاسم الكبيش
2-عبدالنبي الحلال
3-علي السعيد
4-ابراهيم الحواج
5-ملا كاظم الزواد
6-عبدالنبي مدن
وغيرهم الكثير لكن هذا اللي قدرت أحصل عليه .....
بعد خلونا نذكر الملالي (الخطباء) اللي تعلموا عند معلمين :
الاستاذ : ملا علي بن سالم ( وهو شاعر كبير وعظيم ويقال أنه شبه ملا عطيه ) وتتلمذ على يديه :
1-عبدالمحسن النصر
2-عبدالكريم الحمود
3-أحمد خميس
4- الشيخ عبدالمجيد أبوالمكارم
وغيرهم الكثير أيضا .....
حفظ الله الباقين ورحم الله المتوفين .....
------------------------------------------------
المراجع :
1-من الذاكرة
2-أحد المؤمنين نقلا عن إحدى قريباته
[ALIGN=LEFT][SIZE=1][هذا الموضوع تم تحريره بواسطة الامين (في 29-05-2000).]