الأول والحين

[الامين]

1- الأول : نلعب مع البنات ألعاب حلوة وبريئة , ولا أحد يدري عن شيء وتطالعهم كلهم كنهم خواتك ....
الحين : الياهل اللي عمره 12 سنة يروح سوق السبت يغازل ....
2- الأول : نخاف على شعور جارنا , اذا أكلنا الدجاج ما نرمي الريش على باب البيت حتى لا يتأثر الجار ...
الحين : نتشدق واذا واحد شاف جاره شرى له سياره قام الثاني وشرى سيارتين .....
3- الأول : اذا رجال كبير طقنا على شان سوينا شيء غلط سكتنا ورحنا البيت خايفين بعد ..
الحين : اذا واحد كبير شاف واحد صغير يسوي شيء غلط وطقه , ياويله أولا من لسان الصغير (انت اش عليك مني) وثانيا من أبوه يمكن يشتكي عند الشرطة
4- الأول : تحصل كثير أخوة من الرضاعة ... تدري ليش لأن اذا أمه ما قدرت على رضاعته فزعت جارتها ورضعته ...
الحين يموت الجار وما حد يدري ....

يا زين الاول ....

[الامين]

نسيت شيء مهم :
الأول : البنيه تلبس البخنق ويهها مفتوح وتلعب ولا أحد لها
الحين : البنيه تلبس دفه ومغمغمه وحالتها حاله والناس وراها تخزها تبغي حتى تخترق الدفه

[فدك]

تعليقاً على ماورد اعلاه :
مو على مفتوح ويهها وبس إلا عمرها اللي تعدى الثلاتة عشر سنه وهي شايلة الدفة وإذا بغت ترجع البيت لبستها ، لدرجة أن اللي جاي لبوها يخطبها شافها في الطريق وهي تلعب ويا أولاد الفريج !!!!!
و عادي الأمر عنده يروح لولده ويقول : شفت لك بنية ويش حلاوتها .
والأدهي من ذلك طريقة الخطبة حيث تجي أم الولد ليدتها وتقول لها طالبتنش تعطينى هال حويجة ، ألا يشوف يقول البنية ميمشى والله صفرية عشان تقول حويجة ..
ومع ذلك يظل أهل لول أصحاب النيات الصافية . . . . .

أختكم : فــــــــــــــــــــــــــــد ك